എന്തുകൊണ്ട് ഭരണഘടന സാക്ഷരത?

ഇന്ത്യ എന്ന ബൃഹത്തായ രാജ്യത്തിന്റെ  ഭരണഘടന ലോകത്തെ ഏറ്റവും  വലിയ  നവോത്ഥാന നിയമരേഖയാണ്.  ഇന്ത്യയുടെ മൗലിക നിയമമാണ്  ഭരണഘടന. ഇന്ത്യയിലെ ഓരോ മനുഷ്യനേയും  ഒരു പോലെ ഉള്‍ക്കൊളളുന്ന  നമ്മുടെ ഭരണഘടന പൗരന്  ഉറപ്പാക്കുന്ന  അവകാശങ്ങളും അധികാരങ്ങളും  എത്രത്തോളം ഇന്ത്യയിലെ ജനങ്ങള്‍ മനസ്സിലാക്കിയിട്ടുണ്ട് എന്നുളളത്  വലിയ പരിഗണന അര്‍ഹിക്കുന്ന  വിഷയമാണ്. ഓരോ വ്യക്തിയുടേയും  അവകാശങ്ങളും  ഉത്തരവാദിത്തങ്ങളും നിര്‍വ്വചിച്ചിരിക്കുന്ന രാജ്യത്തിന്റെ  ഭരണഘടന മഹത്തായ തുല്യതയുടെ രേഖയും  മാനവിക മൂല്യത്തിന്റെ  പ്രഖ്യാപനവുമാണ്. ഭരണഘടനയുടെ മൂല്യങ്ങള്‍ ഓരോ വ്യക്തിയുടേയും  ദൈനംദിന ജീവിതത്തിന്റെ ഭാഗമാകേണ്ടത്  ഒരു അനിവാര്യതയാണ്. ഭരണഘടന നിലവില്‍ വന്ന്  72 വര്‍ഷങ്ങള്‍ക്ക് ശേഷവും    ഭരണഘടനാമൂല്യങ്ങള്‍ മനസ്സിലാക്കുന്നതിനും  അവ ഉയര്‍ത്തി പിടിക്കുന്നതിനും നമ്മള്‍  ശ്രദ്ധാലുക്കളാണോ എന്ന കാര്യം ചര്‍ച്ച  ചെയ്യപ്പെടേണ്ടതാണ്.